Tsismosa, Ako

May ilan akong kakilala na ang buong akala ay sumkinda wild child ako. Sumkinda true naman. Aaminin ko, may pagka-lukaret ako. Pero dito, sa bagong bansang ito, naipamukha sa akin na meron din akong aspetong konserbatibo. Hindi ko alam kung bakit (nasa alignment kaya ng planets?) pero sa kasalukuyan ay napapaligiran ako ng mga babaeng may asawa o nobyo, pero mayroon ding pangalawang pag-ibig. Pramis, hindi makitid ang utak ko. Naniniwala ako na kailangan nating hayaan ang bawat isa na buhayin ang buhay na magpapaligaya sa kanya. Pero pag kuwentong kalaguyo na, napapanganga ako. Kapag nagsasalaysay ang mga girl friends ko tungkol sa kani-kanilang pamamangka sa dalawang ilog, sa loob-loob ay napapa-ohmygod ako. Tapos, natatawa ako sa sarili ko. Kasi kahit saanman ako dalhin, hindi ko yata talaga makakalimutan ang mga turo ng loka-loka-pero-relihiyosang nanay ko.